Ҳаҭыр зқәу Аԥсны атәылауаа!

Акыр иаԥсоу аветеранцәа!

          Иахьа ҳара гәадуралеи гәырӷьарылеи ҳаԥылоит Аԥсны Аҳәынҭқарра Аиааиреи Ахьыԥшымреи Рымш. Арҭ аҭоурыхтә хҭысқәа рыҩбагьы иузеиҟәымҭхо еидҳәалоуп. Ҳажәлар иргаз аиааира ду ауп Ҳхьыԥшымра,   Ҳҳәынҭқарра Асуверенитет уасхырс иазышьҭалаз.

          32 шықәса раԥхьа Аԥсны жәлар рџьынџьтәылатә еибашьраҿы иргаз аиааира, ҳажәлар шәышықәсала ахақәиҭраз рықәԥара иалҵшәаны иҟалеит. Аԥсуа еибашьцәа, аветеранцәа, аԥсуа жәлар зегьы иаадырԥшыз афырхаҵареи, ахамеигӡареи ҳҳәынҭқарра ҳахьчартә, жәларбжьаратәи азхаҵара ҳауртә еиԥш алшара ҳнаҭеит.

          Ҳара, Аԥсны ахақәиҭра зхақәызҵаз дарбанзаалак аӡәгьы даҳхашҭуам, наунагӡа даанхоит ҳажәлар ргәалашәараҿ. Зыгәаӷьралеи зхаҵаралеи ҳара ҳзы иҿырԥшыгахаз, ҳветеранцәа гәымшәақәа рҿаԥхьа ҳхырхәоит.

          Ахьыԥшымра – иахьа иазгәаҳҭо, ҳақәԥареи, ҳаԥсадгьыл ԥхьаҟатәи аԥеиԥш бзиа агәрагареи ирылҵшәахеит.

          Ҳара, иахьатәи абиԥара, ҳабацәа иаҳзынрыжьыз хәызмам амазара аиқәырхареи аизырҳареи рзы аҭакԥхықәра ҳхахьы иаҳгоит.

          Хықәкы хадас ҳара иҳамоу, иӷәӷәоу, еизҳазыӷьо, аиашара шьаҭас измоу аҳәынҭқарра аргылароуп!

          Абри Аныҳәа ду амш азы, ҳара, Аԥсны Аҳәынҭқарра Аконтрольтә палата аусзуҩцәа гәык-ԥсык ала ирыдаҳныҳәалоит  ҳауаажәлар зегьы! Ирзеиӷьаҳшьоит агәабзиара, агәамч, аманшәалара, аҭынчра, ақәҿиара дуқәа рнапы зларкуа аусқәа зегьы рҟны.

          Аиааиреи Ахьыԥшымреи рымшныҳәа шәадныҳәалаз! Ҽаанбзиала!